परियोजना तथा खबर गरौं हेल्पलाईन सेवाको परिचय

नेपालको जनसंख्याको तथ्याङ्क हेर्दा ५१ प्रतिशत भन्दा बढि संख्या महिलाहरूको रहेको छ । विश्वभरि जीवनसाथीद्वारा हुने हिंसामा पर्ने अति प्रभावित १५ अोटा मुलुक मध्य नेपाल चौधौ स्थानमा पर्दछ । त्यसमा पनि ३३ प्रतिशत महिलाले कुनै न कुनै किसिमको भावनात्मक, तथा यौनजन्य हिंसा आफ्नै श्रीमानबाट पाएका छन् । तथापि स्रोत साधन तथा अधिकारको वितरण तथा उपभोगको सवालमा महिलाहरू पछि परेको देखिन्छ । यसै सन्दर्भमा लैङ्गिक समता तथा समानताको लागि एकजुट भइ कार्य गर्ने अावश्यकतालाई महसुस गरी राष्ट्रिय महिला आयोगको नेतृत्वमा सन् २०१६ देखि लैङ्गिकतामा आधारित हिंसाको विरुद्ध एकिकृत प्रयासको रुपमा लैङ्गिक हिंसा रोकथाम र सम्बोधनका लागि एकिकृत (Integrated Platform for Gender Based Violence Prevention and Response) परियोजनाको शुभारम्भ भएको हो । विश्व बैंकको आर्थिक सहयोगमा यो परियोजना संचालनमा छ । साथै, यस परियोजनाको काम कार्यवाहीलाई सहयोग गर्न केयर नेपाल प्राविधिक सहयोगी संस्थाको रुपमा रहेको छ । यस परियोजनाको मुख्य उद्देश्य भनेको लैङ्गिकतामा आधारित हिंसाको सम्बोधन स्वरुप गुणस्तरीय हेल्पलाईनको विकास गरि हिंसा प्रभावित वा हिंसामा परेका बालिका तथा महिलाहरूसम्म सेवा पुर्‍याउनु रहेको छ ।

परियोजनाको मुख्य उद्देश्यहरू

लैङ्गिकतामा आधारित हिंसाको विरुद्ध निःशुल्क हेल्पलाईन सेवा (टेलिफोन सेवा) संचालन गर्ने

राष्ट्रिय महिला आयोगको सेवा सुविधालाई अझ चुस्त, गुणस्तरीय तथा व्यापक बनाउने

लैङ्गिकतामा आधारित हिंसासँग सम्बन्धित मुख्य सरोकारवालाहरूमा जनचेतना अभिबृद्धि गर्ने

परियोजनाको लक्षित जिल्लाहरू

Map

परियोजनाको लक्षित वर्ग

यस परियोजनाका मुख्य लक्षित वर्ग महिला तथा बालिकाहरू हुन् ।

खबर गरौं ११४५ (हेल्पलाईन) सेवा कसरी लिने ?

कुनै पनि व्यक्तिमाथि लैङ्गिकतामा आधारित हिंसा भएको छ भने हिंसा रोक्न वा थप क्षति हुन नदिन ११४५ नम्बरमा टेलिफोन मार्फत सम्पर्क गर्नसकिन्छ । “खबर गरौं ११४५” हेल्पलाईन सेवामा नेपालभरीबाट कुनै पनि व्यक्तिले निःशुल्क रुपमा टेलिफोन गरी जानकारी लिन वा दिन सक्दछन् ।

“खबर गरौं ११४५” (हेल्पलाईन) को प्रयोग कसले गर्न सक्दछन् ?

  • हिंसामा परेको व्यक्ति स्वयंले
  • हिंसाका घटना घट्न सक्छ भनेर थाहा पाउने व्यक्तिले
  • लैङ्गिक हिंसा न्यूनीकरण तथा रोकथाम सम्बन्धी काम गर्ने संघ संस्थाहरूले
  • अन्य जुनसुकै व्यक्तिहरूले

“खबर गरौं ११४५” (हेल्पलाईन) को प्रयोग कहिले गर्न सकिन्छ ?

“खबर गरौं ११४५” (हेल्पलाईन) सेवा हप्ताको सातै दिन २४सै घण्टा उपलब्ध रहने छ ।

“खबर गरौं ११४५” (हेल्पलाईन) मा उपलब्ध सेवाहरू के के छन् ?

यो सेवा अन्तर्गत हिंसावाट प्रभावित महिला र बालिकालाई राहत दिनका लागि हिंसामा परेमा निज व्यक्ति वा परिवारलाई टेलिफोन मार्फत परामर्श, सहयोग, सल्लाह वा सुझाव दिने गरिन्छ । साथै आवश्यकता अनुसार यस परियोजनाका साझेदार संस्थाहरूसँगको सहकार्यमा तल उल्लेखित सेवाहरू पनि उपलब्ध गराइन्छ ।

  • अति हिंसामा परेका महिला तथा किशोरीहरूका लागि सुरक्षित बास (Shelter service)
  • कानुनी परामर्श तथा उपचार सेवा
  • १८ वर्ष मुनिका प्रभावितलाई विशेष सेवा
  • मनोसामाजिक परामर्श सेवा
  • आधारभूत स्वास्थ्य सेवा